فاهيتا الفراخ (على الطريقه المكسيكيه)

من الاكلات الصيفيه الخفيفه والسريعه والمبهجه بالوانها المتعدده وطعمها الرائع... اغلبنا بياكلها في المطاعم وكتير مننا بيكون فاكر ان عملها في البيت صعب..

الحقيقه هي وصفه من اسهل واسرع ما يكون واتمنى كلكم تجربوها.

المكونات :
------------
1- صدور فراخ مخليه.
2- ثلاث حبات فلفل رومي الوان (احمر + اخضر + اصفر وممكن برتقالي كمان ) مقطع شرائح طوليه.
3- بصله كبيره مقطعه جوليان.
4- مشروم طازج مقطع شرائح (اختياري).
وللتتبيل :
5- ملح + فلفل اسود + كمون (مهم جدا) + بابريكا + زعتر بري (اويجانو).
6- عصير ليمون + بشر ليمون.
7- بصله صغيره مقطعه.
8- زيت زيتون.
9- صويا صوص + سويت شيلي صوص(لاضافه لمعه للطبق).
10- اوراق كزبره خضراء كامله للتزيين(مهمه جدا).

الطريقة :
-----------
1- نخلط جميع مكونات التتبيله وننقع فيهم صدور الدجاج لفتره كافيه.

2- نزيل التتبيله جيدا من صدور الدجاج ونمسحها بزيت الزيتون ونشويها على جريل ساخن جدا لمده من 3 ل 4 دقائق من كل جهة.

3- نترك الصدور المشويه ترتاح في طبق مغطى ونضيف ملعقه زيت زيتون في نفس الجريل ونشوح فيه البصل والفلفل والمشروم لمده دقيقتين مع اضافه القليل من الملح.
4- نقطع صدور الدجاج المشويه شرائح بزاويه ثم نضيفها للخضار في الجريل ونقلب.
**ملحوظه مهمه جدا : 
نراعي ان الفراخ والخضار مش بيستوا من الاول مع بعض وان الفراخ بتتشوي سليمه على الجريل وبعدها بتتقطع..الموضوع ده بيأثر جدا على الطعم لان طعم الشوي مش هيكتسب لو طبخنا الخضار مع الفراخ مره واحده.وكمان لو قطعنا الفراخ صغير قبل الشوي هتنشف وتفقد طراوتها. كمان الخضار هيدبل ومش هيدينا القرمشه المطلوبه لو اخد نفس وقت تسويه الفراخ.

5- نضيف عصره ليمون وملعقه صغيره صويا صوص و سويت شيلي صوص وبعض اوراق الكزبره ونقلب(زي ما قلنا السويت شيلي هيعمل glazing للمكونات ويخلي شكلها احلى بالاضافه للطعم) .
6- نرفع الفاهيتا من على النار مباشره في طبق التقديم وتزين باوراق الكزبره الطازجه على الوجه.
تقدم مع خبر التورتيلا الساخن وسلطه الجواكامولي (سلطة الافوكادو) والساور كريم .

**ولتجهيز الساندوتش يتم اضافه سلطة الافوكادو لخبز التورتيلا .. وبعدها توضع الفاهيتا ...ثم توضع ملعقه من الساور كريم ..ويطوى اسفل الخبز (عشان الفاهيتا متوقعش ) ويلف الجانبين.

بالهنا والشفا...

شارك هذا المنشور